MONDAY OCT 13, 2025

‘तीजगीत प्रतियोगिताले मौलिक र परम्परागत भाकालाई जीवन्त राख्छ’ ११ औं मालेपाटन तीजगीत प्रतियोगिता शुरु

१० भदौ, पोखरा । गण्डकी प्रदेशका प्रदेश प्रमुख डिल्लीराज भट्टले परम्परागत तीजगीत प्रतियोगिताले मौलिक तीजे भाकाहरू जीवन्त राख्न सघाउ पुग्ने बताएका छन् ।

पोखराको मालेपाटनस्थित सूर्यचन्द्र विकास समाजले आयोजना गरेको ११ औं मालेपाटन तीजगीत प्रतियोगिताको शुभारम्भ गर्दै प्रदेश प्रमुख भट्टले पछिल्लो प्रविधियुक्त समयमा तीजको मौलिकतालाई पनि असर गरिरहेको सन्दर्भमा यस्ता प्रतियोगिताहरुको महत्त्व रहने उल्लेख गरे ।

‘निराहार व्रत बस्नुअघि माइत गएर खाइने दर हप्तौंअघि होटल तथा पार्टी प्यालेसमा खाने प्रचलन बढ्दो छ । सुसभ्य तीज गीत सुन्नै मुस्किलको अवस्था छ । समाजको यो परिवेशका बीचमा सूर्यचन्द्रले आयोजना गरेको तीजगीत प्रतियोगिताले हाम्रा भाका जीवन्त राख्न सघाउ पु¥याउनेछ । उनले भने ।

संस्कृति सम्पूर्ण समाजको जीवन पद्धति रहेको बताउँदै उनले मानिसको धर्म, भाषा, शिष्टाचार, अनुष्ठान र कला संस्कृतिमा समाविष्ट हुने उल्लेख गरे ।

‘नेपाली संस्कृति धेरै पुरानो र विविधतायुक्त छ । युवाहरूले आफ्नो संस्कृतिलाई प्रवद्र्धन र रक्षा गर्न जरुरी छ ।’ उनले भने– ‘समयकाल परिवर्तनसँगै कुनै पनि संस्कृतिको नराम्रा पक्षलाई सुधार्नु जरुरी छ भने अनुकूल सांस्कृतिक पक्षलाई बचाइराख्न पनि उत्तिकै आवश्यक हुन्छ । यिनको मूल्य, मान्यता र पहिचानलाई भने कायम गर्नुपर्ने हुन्छ ।’

२०५१ सालमा स्थापित संस्थाले ३१ वर्षको लामो अवधिमा साहित्य र संस्कृतिको धरोहर बनेर साहित्य, कला, संस्कृति, राष्ट्रिय कवि सम्मेलन, दुर्व्यसनसम्बन्धी सचेतना, विभिन्न स्वास्थ्य शिविर, वातावरण संरक्षण, महिला सशक्तिकरण, पठन संस्कृतिको विकासका लागि पुस्तकालय, विद्यार्थी तथा जेष्ठ नागरिक सम्मान जस्ता विविध क्षेत्रमा काम गर्दै आइरहेको छ ।

Facebook Comments