गोधूलि कला साहित्य प्रतिष्ठानकी सारथि बन्दै पशुपति गुरुङ
नेपाली वाङ्मयको श्रीवृद्धिमा निरन्तर क्रियाशील रहँदै आएको गोधूलि कला साहित्य प्रतिष्ठानको स्थायीयत्वका लागि साहित्यसेवी तथा समाजसेवी पशुपति गुरुङ असल सारथि आएकी छन् ।
प्रतिष्ठानका विभिन्न कार्यक्रमका सहयोग पु¥याउँदै आएकी गुरुङले पछिल्लो समय प्रतिष्ठानका लागि पाँच लाख, पाँच हजार, पाँच सय रुपैयाँँ सहयोग गरेकी छन् ।
संस्कार समाज नेपालकी अध्यक्षसमेत रहेकी गुरुङले आफ्नो दाम्पत्य जीवनको २५ औं वैवाहिक वर्षगाठलाई वाङ्मय सेवाका क्षेत्रमा समर्पण गरेर मनाएकी हुन् ।
असल संस्कार समृद्धिको आधार उद्घोषका साथ आफ्नो देश आफैँ बनाउनुपर्छ भनेर अगाडि बढ्ने पशुपति गुरुङ साहित्यकारसमेत हुन् । साहित्यकार गुरुङ समृद्ध राष्ट्र निर्माणको महाअभियान लिएर अगाडि बढेकी जनचेतनामूलक सरसफाइ कार्यक्रमकी संयोजकसमेत रहेकी छन् ।
प्रतिष्ठानद्वारा आयोजित गोधूलि भानुकाव्योत्सव–२०८२ समारोह बीच गुरुङले उक्त सहयोग हस्तान्तरण गरेकी हुन् ।
कार्यक्रमका प्रमुख अतिथि तुलसी दिवसले साहित्यिक क्षेत्रको श्रीवृद्धिमा पशुपति गुरुङबाट नाम जस्तै काम भएको धारणा राख्दै प्रशंसा गरे ।
समाजसेवी गुरुङले नेपाली भाषा, साहित्य, संस्कृति र समाजसेवाका क्षेत्रमा सहयोग गर्न पाउँदा खुसी लागेको धारणा व्यक्त गरिन् ।
साहित्यप्रेमी बुद्धिप्रसाद गुरुङले नेपाली भाषा साहित्यको श्रीवृद्धिका लागि योगदान पुगोस् भन्ने उद्देश्यले विवाह उत्सवलाई खर्चिलो भन्दा पनि सेवामुखी बनाउनका लागि सहयोग गरेको बताए ।
कवि विश्वविमोहन श्रेष्ठले गुरुङको समाजसेवा र साहित्यसेवाप्रतिको योगदानको स्मरण गर्दै स्तुत्य कार्यका लागि आभार व्यक्त गरे ।
प्रतिष्ठानका अध्यक्ष प्रकाश समीरले गुरुङले विभिन्न समयका गोधूलिका कार्यक्रमलाई सहयोग गर्दै आइरहे तापनि यो सहयोगले हर्षविभोर भएको बताउँदै रकमको पूर्ण सदुपयोग गर्ने प्रतिबद्धता व्यक्त गरे ।
पछिल्लो समय विवाह उत्सवहरू महङ्गा र भड्किला बन्दै गएको अवस्थामा हामीले पनि एक पटक पशुपति गुरुङको सत् कर्मको मनन गर्ने कि ? यो प्रश्न उनले सबैलाई उब्जाइदिएकी छन् ।
पशुपतिको यो स्तुत्य कार्यका लागि हार्दिक बधाई !